nr. 9, 2021: Stigmatisert kunnskap
Føler du deg trakka på av storsamfunnet, er du meir sårbar for konspirasjonsteoriar. Og kjøper du ein kan du fort kjøpa fleire. Kva ansvar har teknologigigantane?
Center for Countering Digital Hate (CCDH) er ein organisasjon som søkjer å få amerikanske big tech-selskap (Facebook, Twitter, YouTube osv) til å stenga ute formidlarar av hat og desinformasjon. Det reiser sjølvsagt nokre prinsipielle spørsmål, både rundt kor viktige dei store teknologiselskapa har vorte for offentleg debatt og for tilhøvet mellom dette og ytringsfridomen, samt om såkalla deplatforming.
Dei diskusjonane skal me lata liggja i dette nyhetsbrevet, men dei kan vera verdt å ha med i mente, når me som utgangspunkt for ein vidare diskusjon skal sjå på CCDH-rapporten The disinformation dozen: why platforms must act on twelve leading online anti-vaxxers. Denne ser nærare på tolv konkrete kjeder til store mengder av feilinformasjonen om vaksiner som verserer i sosiale media: Joseph Mercola, Robert F. Kennedy jr., Ty og Charlene Bollinger, Sherri Tenpenny, Rizza Islam, Rashid Buttar, Erin Elizabeth, Sayer Ji, Kelly Brogan, Christiane Northrup, Ben Tapper og Kevin Jenkins.
I vår samanhang skal me nøya oss med å sjå på fire av dei: Joseph Mercola, Erin Elizabeth og ekteparet Bollinger.
Frå helsekost til konspiranoia
Mercola er ein amerikansk osteopat, og mannen bak nettstaden mercola.com, ein nettstad som presenterer ei salig blanding av medisinske råd, tabloide framstillingar og rein pseudomedisin.
I årevis har Mercola fulgt den same oppskrifta. I 2009 gav han til dømes ut boka The Great Bird Flu Hoax. Denne boka kombinerer ein tidvis ganske rimeleg mediekritikk med skepsis mot både farmasøytisk industri generelt og vaksiner konkret. Så vert alternativet presentert: diett- og livstilsendringar. “Du finn mange konsistente og konkrete tilrådingar på min nettstad”, skriv Mercola i boka, “Oversjå plasterløysingane du vert tilbydd av føderale myndigheiter og den farmasøytiske industrien og ta istadenfor proaktive val for å forbetra di helse”. Med andre ord: Kjøp hjå meg istaden.
Og Mercola sel. Han har bygd opp noko av eit e-handels-imperium, og har tent ei formue på å selja kosttilskot.
Diktaturet som trugar
I april i år kjem Mercola ut med ei ny bok, saman med Ronnie Cummins, leiar for øko-organisasjonen Organic Consumers Association. I førehandsomtala av The Truth About COVID-19 heiter det mellom anna at me i skuggen av pandemien har eit val mellom eit diktatur tilbydd oss av “transhumanistiske, teknokratiske ‘overlords’” eller fridom og demokrati. Vidare vert det lova at boka skal avsløra dei skitne gjerningane og eigentlege måla til “digitale diktatorar, fryktseljarar, gale vitskapsfolk, medisinske fascistar” og til “kjøpte og betalte politikarar”, slik at folk flest kan vakna opp å bekjempe trugsmålet frå både det digitale diktaturet og det framveksande Great Reset.
Ein spanskspråkleg artikkel på mercola.com forklarer nærare:
Sjølv om COVID-19-pandemien vert nytta til å rettferdiggjera The Great Reset er formålet ikkje knytt til helse, men snarare til ein langvarig plan om å overvaka og kontrollera verda gjennom digital overvaking. […]
Det er eit svært stort grep etter makta, og involverer restrukturering av sosiale klassar for å demontera demokratiet, fjerna nasjonale grenser og at samfunn skal herskast over frå avstand av ei gruppe sjølvutnemnde leiarar. Det som tidlegare var kjend som “New World Order” er no kjend som “The Great Reset”.
Great Reset er eit omgrep henta frå World Economic Forum sin konferanse i juni 2020, der det vart diskutert korleis COVID-19-krisa kunne møtast med tiltak i tråd med FN sine bærekraftsmål. I månadane som har gått har omgrepet imidlertid vorte ein del av eit konspirasjonsteoretisk univers, som omtalt av til dømes BBC.
Referansen til New World Order er her også verdt å leggja merke til: innanfor amerikansk konspirasjonskultur refererer omgrepet til ei framveksande, verdsomspennande regjering som samlar all makt i sin hender, som skildra mellom anna i TV-evangelisten Pat Robertson si bok The New World Order, ei bok som trekkjer liner frå Illuminati til frimurarar til kommunisme.
Fiendebilete: Bill Gates og Jacob Rothschild
Lat oss gå vidare til Erin Elizabeth, som for øvrig er Mercola sin kjærast gjennom ei årrekkje. Ho driv nettstaden Health Nut News. Der finn ein stoff om helsekost, igjen blanda med enkelte tabloide nyhende. Health Nut News er også tilgjengeleg i ulike sosiale media, der Erin Elizabeth i tillegg formidlar til dømes “politisk kunst” rundt Bill Gates:
Teke i betraktning konspirasjonsteoriane som svirrar rundt Gates i samband med koronapandemien - han vert gjerne måla som ein sentral skikkelse i eit globalt komplott - er dette ganske mørkt. Det blir likevel mørkare når Elizabeth fortel om korleis den “globale eliten styrer showet”, og knyter det saman med både New World Order og med Rothschild-slekta, i det ein ikkje treng skrapa noko vidare på overflata til for å kjenna att som antisemittisme.
Stigmatisert kunnskap
Kvifor denne samanblandinga av alternativ behandling, helsekost og konspirasjonsteoretiske idear? Ei forklaring er fenomenet den amerikanske sosiologen Michael Barkun har omtalt som “stigmatisert kunnskap”.
I boka Hva er konspirasjonsteorier? samanfattar Asbjørn Dyrendal og Terje Emberland fenomenet ved å seia at den som sit med ei kjensle av å ha kunnskap som vert avfeidd og stigmatisert av etablisementet fort også kan fatta interesse for også andre avfeidde teoriar:
Dermed har vi en holdning i dette utvidete kultiske miljøet, eller i miljøet for stigmatisert kunnskap, som oppmuntrer til å gå på tvers av etablerte skillelinjer: ufologi, kristen apokalyptikk, høyreekstremisme, venstreorientert kapitalisme- og globaliseringskritikk, rasisme, alternativmedisin – alt kan bli attraktivt på grunn av de samme mekanismene og resonnementene som driver konspirasjonsteorier i utvikling.
Fenomenet blir ikkje mindre tydeleg når me ser på den tidlegare bodybuilderen Ty Bollinger og kona Charlene. Dei står mellom anna bak nettstaden The Truth About Cancer, ein nettstad der du slett ikkje kan rekna med å finna sanninga om kreft, men snarare ei lang rekkje tvilsame helseråd.
I 2020 har dei dessutan spreidd eit assortert utval teoriar om koronaviruset, inklusive at sjukdomen eigentleg er forårsaka av utbygging av 5G-nettet, at viruset eigentleg vart laga i eit hemmeleg laboratorium og sjølvsagt at pandemien vert nytta for å gjennomføra “den mest radikale og omsynslause planen me har sett i vår levetid”.
Igjen: The Great Reset. Bollinger-paret sin nettstad skildrar faktisk COVID-19 som “berre ein liten del av ein koordinert langtidsplan” med denne “gjenstarten” som siktemål. Og det heile vert sjølvsagt kopla saman med påstandar om at Trump sitt valnederlag var eit resultat av valfusk. Ekteparet Bollinger var i Washington D.C den 6. januar i år:
Charlene Bollinger introduced the speakers at her group's rally near the US Capitol, plugged her documentaries and blasted what she called, "the forced Covid vaccine, such a scam." She also told attendees that her husband Ty wasn't with her because he had gone to join the siege.
"I told him... they are storming the Capitol, and he looked at me and said, 'Do I need to stay here?' I knew he wanted to go. I said, 'Honey go,' so he did," she said.
Charlene Bollinger added that Ty texted her and said he was "outside" the Capitol. She then prayed "for the patriots that are there now inside. They're trying to get inside that Capitol. Lord, use these people to eradicate this evil, these swamp creatures."
Ein annan fersk rapport frå CCDH, Malgorithm, synleggjer på sett og vis korleis Instagram sine algoritmar kan stø opp under stigmatisert kunnskap. Følgjer du leiande “vaksinemotstandarar” på Instagram, får du gjerne også presentert tilrådingar til anna innhald, med annan desinformasjon, hevdar CCDH, som etterlyser handling frå både teknologiselskapa sjølv og frå myndigheitene.
David Icke
Ein av CCDH sin aller fyrste kampanjar dreidde seg om David Icke. Icke er ein tidlegare fotballspelar og sportsjournalist som i ei kort periode sist på 1980-talet og fyrst på 1990-talet også var aktiv i det vesle grøne partiet i Storbritannia. I 1991 trakk han seg frå partiet. Ikkje lenge etterpå heldt han ein bisarr pressekonferanse, der han blant anna hevda å vera “a son of the Godhead”, og i tillegg kom med ei rekkje påstandar om komande katastrofer. I etterkant vart han også intervjua av BBC-journalisten Terry Wogan, i ein ikkje mindre bisarr seanse.
Det stogga ikkje der: I løpet av åra som fulgte utvikla Icke ei rekkje idéar som er så spinnville og så bisarre at dei nærast kan framstå som ein karikatur på konspirasjonsteoriar. Han hevdar at ein slags interdimensjonale romøgler, kalla anunnaki, har sikra seg kontroll over Jorda, og at ei genmodifisert blandingrase mellom desse reptilane og menneske står bak eit mørkt komplott som heldt menneska nede.
I boka The Biggest Secret frå 1999 vever han denne forteljinga saman med både andre konspirasjonsteoriar og med kjente myter og legender. Han omtaler også ei rekkje namngjevne personar som tilhøyrande denne reptilrasen, blant anna dronning Elizabeth, eller El-lizard-birth.
Uavhengig av kva ein måtte meina om løysingane CCDH etterlyser er det neppe vidare omstridd å påstå at Icke driv med desinformasjon. Det fortel ein heil del om stigmatisert kunnskap som fenomen at også han dukkar opp i norske “vaksinekritiske” kanalar.
Kanskje endå verre: Ein kan også støyta på referansar til Icke i barnevernkritiske forum, som det kan sjå ut som om konspirasjonsteoretikarar bevisst oppsøkjer for å spreia bodskapen sin.
Ikkje underhaldande
Konspirasjonsteoriar vert for ofte sett på som underhaldande, og det vert også laga ein del ganske lettbeint underhaldning ut av fenomenet, til dømes i form av podcastar.
Men dette er det til sjuande og sist svært lite morosamt ved: Konspirasjonsteoriar sler lettare rot hjå menneske som er i ein sårbar situasjon, som føler seg utrygge eller framandgjorte, eller som kjenner på ein grunnleggjande mistillit til storsamfunn og autoritetar. Og når mekanismen rundt stigmatisert kunnskap slår til kan dette både suga menneske ned i eit mørkt kaninhol. Dessutan kan det vera til skade for reelle, og viktige, debattar; ikkje om nonsens som kor vidt 5G-nettet forårsaker korona, men til dømes om norsk barnevernspraksis.
Difor: Sjølv om ein kan diskutera CCDH sine framlegg til tiltak, er det lita tvil om at dei har eit poeng når dei peiker på teknologigigantane sitt ansvar.
Kva er dette?
“Oppdateringar om det ekstreme” er eit nyhetsbrev om ekstremisme og konspirasjonsteoriar laga av Øyvind Strømmen.
Nyhetsbrevet vert laga på fritida, og vil difor koma ut sporadisk. Det er gratis å abonnera, og alle abonnentar får tilgang på dei same nyhetsbreva. Dersom du har høve til og ynskjer å bidra med nokre kroner kan du velja eit betalt abonnement.
Klikk her for å abonnera:
Har du tips eller forslag til ting det burde skrivast om, eller til artiklar, podcastar eller anna som fortener ein plass på lista over eksternt stoff ? I så fall, ta gjerne kontakt. Det kan du gjera via kontaktskjemaet på oyvindstrommen.no.
Tips til eksternt stoff om ekstremisme og konspirasjonsteoriar:
Podcast frå Daily Beast: Did you know that everyone’s favorite Suez-Canal-blocking ship is now the subject of a QAnon conspiracy?
Filter Nyheter: 5 punkter: «Vil få flere til å åpne øynene» – slik reagerer de på Qanon-dokumentaren
VICE: U.S. Man Deported From Ukraine Was Marine Dropout Linked to Neo-Nazi Terror Group
ASPI Strategist: Boogaloo Bois: the birth of a ‘movement’, from memes to real-world violence