nr. 7, 2021: Gab
Store mengder brukardata frå det alternative sosiale mediet Gab er lekka etter eit datainnbrot. Ifølge Gab-sjefen står “mentalt sjuke transedemonhackarar” bak.
27. oktober 2018 gjekk Robert Gregory Bowers til åtak på Tree of Life-synagoga i Pittsburgh, Pennsylvania. Han drap elleve menneske og såra seks.
Alt tyder på at 46 år gamle Bowers var motivert av høgreekstrem og antisemittisk ideologi. I det han opna eld skal han ha ropt “Alle jødar må dø”, og like i forkant av åtaket posta han ein kommentar på Gab. Kommentaren retta eit åtak mot HIAS, ein jødisk-amerikansk organisasjon som driv med hjelpearbeid blant flyktningar. Vidare skreiv han: “Screw your optics, I´m going in”.
Det er ein referanse til interne debattar og korleis ytre høgre i USA skal framstå spiselege for fleire, og kan lett forståast som eit uttrykk for at Bowers såg på dette som uvesentleg, og på handling som naudsynt.
Bowers sin eigenpresentasjon på Gab sa elles at “jødar er born av satan”, med referanse til eit bibelvers, og på bakgrunnsbiletet sitt hadde han tala 1488; der 14 er dei såkalla 14 orda (“We must secure the existence of our people and a future for white children”) og 88 er den åttande bokstaven i alfabetet to gongar, altså HH, eller “Heil Hitler”.
Det er, og kjem til å vera, gratis å abonnera på nyhetbrevet Oppdateringar om det ekstreme. Dersom du har høve til og ynskjer å bidra med nokre kroner kan du likevel velja eit betalt abonnement.Klikk her for å abonnera.
Bowers sitt terroråtak førte til at det sosiale mediet Gab fekk betydeleg merksemd, som – for å sitera ein artikkel i Washington Post – “ei frihamn for kvit makt-tilhengjarar, nynazistar og andre tilhengjarar av ekstreme ideologiar som i aukande grad opplever å ikkje vera velkomne på Twitter og Facebook”.
Gab dukka opp hausten 2016. Grunnleggjaren Andrew Torba hevda at nettstaden skulle fungera som ei ytringsfridomsplattform og understreka at den skulle vera tilgjengeleg for brukarar på tvers av det politiske spekteret. I røynda vart Gab raskt kjend for å vera knytt til ytre høgrekant. Då Twitter suspenderte kontoane til fleire kjende alt-right-profilar i november det året, stod til dømes Gab klåre til å ta imot både desse profilane og publikummet deira.
Sidan har Gab langt på veg fungert som ein tilfluktsstad for ytre høgre, for ulike konspirasjonsteoretikarar (inkludert QAnon-formidlarar) og andre som opplever det vanskeleg å nå fram via meir tradisjonelle sosiale media. Også dei siste månadene har nye brukarar kome til på denne måten.
Likevel: Gab er avgrensa i omfang, med rundt fire millionar brukarar (og ein heil del av desse, kan ein få inntrykk av, er inaktive; personar som har registrert seg på plattforma ut av nyfikne, men som berre har posta nokre få kommentarar, eller ingen i det heile).
Datainnbrotet
28. februar i år kunne Wired melda at ein hackar som kallar seg sjølv JaXpArO and My Little Anonymous Revival Project har lukkast i å henta ut heile 70 gigabyte av data frå Gab sine databaser.
Den anonyme hackaren – som hevdar å villa representera “dei namnlause, strevande massene” i kamp mot “kapitalistar og fascistar” – har overlevert all denne informasjonen til gruppa Distributed Denial of Secrets (DDoSecrets), som gjerne vert samanlikna med Wikileaks.
Ifølgje DDoSecrets omfattar dataa alle meldingar publisert på sida, inkludert meldinger i lukka grupper og meldingar. “[Lekkasjen] inneheldt stort sett alt på Gab, inkludert brukardata og private postar”, seier Emma Best, ein av grunnleggjarane av DDoSecrets til Wired.
DDoSecrets har gjort det klårt at dei ikkje vil sleppa dataene offentleg, men istadenfor vil dela dei med utvalde journalistar og forskarar.
Wired ba også Gab, ved Andrew Torba, om ein kommentar. Han svara gjennom ei melding på sin eigen nettsstad, der han skulda “journalistane, som skriv for ein publikasjon som tidlegare har kome med mange hit pieces mot Gab” for å vera i “direkte kontakt med hackaren” og for å “hjelpe hackaren” med å skada både Gab og brukarane. Seinare meddelte Torba at “mentalt sjuke transedemonhackarar” stod bak åtaket.
I denne meldinga nemner Torba også at kontoen til USA sin tidlegare president, Donald Trump, vart råka av åtaket. Men sjølv om fleire norske media (sjå t.d. Dagsavisen og digi.no) har handsama brukarnamnet @realdonaldtrump på Gab som om det var Trump sin konto, er den i røynda ein konto drifta av Torba sjølv.
Etisk trøblete
Som A. J. Bauer ved medie- og journalistikkavdelinga til University of Alabama seier i eit intervju med studentavisa Washington Square News kan Gab-informasjonen sjølvsagt vera nyttig for forskarar.
Samstundes er det grunn til å stilla etiske spørsmål, understrekar han. Den såkalla Gableaks står nemleg i klår kontrast til den mykje omtalte dataskrapinga frå Parler i kjølvatnet av storminga av Capitol. Då var det opne data som vart henta ut. Gab vart derimot hacka, og omfattar også privat informasjon.
Så langt har avisa The Guardian har publisert ein artikkel med utgangspunkt i materialet. Denne fokuserer på personar som tilsynelatande har investert i nettstaden, “inkludert nynazistar, QAnon-influensarar, kryptovalutaforkjemparar og konspirasjonsteoretikarar”, og nemner også to av dei ved namn. Artikkelen viser dessutan til meldingar mellom Torba og QAnon-influensaren Richard Cornero jr.:
Direct messages included in the leak appear to show close communication between Torba and a major QAnon influencer who is labeled a Gab investor, seemingly reinforcing the CEO’s public efforts to make Gab a home for adherents to the QAnon conspiracy theory, which helped fuel the 6 January attack on the nation’s Capitol.
Etter at The Guardian kontakta brukarar identifisert i dataene fekk dei også ein e-post frå Gab-sjef Andrew Torba. E-posten var tom, men emnefeltet inneheldt ein referanse til 5. mosebok, 28, 7: “Når fiendane går på deg, skal Herren gjera det slik at du vinn over dei. Kjem dei mot deg på éin veg, skal dei rømma for deg på sju”.
Tips til eksternt stoff om ekstremisme og konspirasjonsteoriar:
Les meir om Gab-lekkasjen på digit.fyi, i Wired og i The Intercept
Min gode ven John Færseth si nye bok Fyrtårnet i øst. Putins Russland og vestlige ekstremister er no tilgjengeleg frå Humanist forlag. Boka fortel om korleis Russland har vorte eit fyrtårn for fleire miljø som på ulike måtar er motstandarar av dagens verdsorden, og tek lesaren med på ei overveldande, men opplysande reise.
Svenske Expo skriv om hatet mot George Soros, og held det opp mot historiske, antisemittiske stereotypar.
Danske DR har ein webfeature om to terrordømte brør involvert i utspekulert databedrageri; pengane kan ha enda opp hjå den somaliske ekstreme islamistgruppa al-Shabaab.
Dokumentarfilmen White Noise gjev eit interessant innblikk i alt-right-rørsla. Sjå filmtraileren og les meir hjå utgjevaren The Atlantic.
Den ferskaste utgåva av podcasten Conspirituality inkluderer blant anna eit intervju med ytre høgre-avhopparen Caolan Robertson, som arbeidde for ytre høgre-kanalen Rebel News. Intervjuet gjev nokre fleire perspektiv på tema i White Noise.
Albert Samaha i Buzzfeed skriv om korleis hans eiga mor vart QAnon-tilhengar.
Politico fortel om korleis Portugal etterlyser EU-hjelp til Mosambik, der ekstreme islamistar er involvert i eit opprør i delstaten Cabo Delgado.
Washington Post fortel om korleis det amerikanske justisdepartementet og FBI samlar bevis mot Oath Keepers. Sjå også utgåve nr. 4, 2021 av dette nyhetsbrevet.
VICE: Trump Official Charged in Capitol Riots Had a Rap Sheet and Still Got Top-Secret Clearance
Sveriges Radio: Så formas desinformation om coronapandemin – ett samtal i efterspelet av demonstrationen mot corona-restriktioner på Medborgarplatsen i Stockholm (radio)
Daily Beast: This Far-Right Network Is Using the Pandemic for a Recruiting Road Trip
Foreign Policy: Are Telegram and Signal Havens for Right-Wing Extremists?
Kva er dette?
“Oppdateringar om det ekstreme” er eit nyhetsbrev om ekstremisme og konspirasjonteoriar laga av Øyvind Strømmen.
Nyhetsbrevet vert laga på fritida, og vil difor koma ut sporadisk. Det er gratis å abonnera, og alle abonnentar får tilgang på dei same nyhetsbreva. Dersom du har høve til og ynskjer å bidra med nokre kroner kan du velja eit betalt abonnement.
Klikk her for å abonnera:
Har du tips eller forslag til ting det burde skrivast om, eller til artiklar, podcastar eller anna som fortener ein plass på lista over eksternt stoff? I så fall, ta gjerne kontakt. Det kan du gjera via kontaktskjemaet på oyvindstrommen.no.