nr. 10, 2024: Jack Posobiec
Jack Posobiec er ein løgnar. Han er også eit symbol på den amerikanske høgresidas forfall.
Berre for få år sidan var Jack Posobiec mest kjent som eit internettroll. Eit døme: I november 2016 tok han turen til pizzarestauranten Comet Ping Pong i Washington D.C, ein stad som hadde hamna midt i ein shitstorm av grunnlause, spinnville påstandar frå konspirasjonsteoretiske nettmiljø.
Ifølgje anklagene desse miljøa spreidde stod leiande demokratiske politikarar – Hillary Clinton blant dei – bak groteske overgrep mot born, overgrep som vart sagt å finna stad i kjellaren til Comet Ping Pong.
Posobiec hadde sjølvsagt fått med seg rykta, men i eit seinare intervju med Washington Post hevda han at han ikkje hadde gjort seg opp noko meining på førehand. «Eg var ikkje sikkert. Eg tenkte at eg kunne visa at det berre var ein vanleg pizzaplass».
Det er eit problem med den historia. Posobiec livestreama besøket på appen Periscope. Etter at personalet på Comet Ping Pong oppdaga at han også tok med seg kameraet inn på eit bakrom der det gjekk føre seg ein barnebursdag, valde dei ha å kasta han ut.
Det verka upassande å lata ein framand mann kringkasta ein barnebursdag på nettet.
Sjølve videostraumen må ein idag leita litt for å finna att. Umogleg er det likevel ikkje. I videoen speler Posobiec opp dei groteske anklagene mot pizzasjappa. Etter å ha blitt kasta ut frå pizzarestauranten hevder han å ha sett eit «hemmeleg bakrom», der «små born gjekk inn og ut, og forsvann, via ei hemmeleg bakdør». Han spekulerte også i at eigaren brukte walkie-talkie for å kommunisera med nokon i ein tunnel eller ein kjellar.
Innan nokre timar etter Posobiec sin livestream tok hashtaggen #pizzagate verkeleg av. Kort tid etterpå vart Posobiec intervjua i konspirasjonsteorimediet framfor noko, Infowars. Der snakka han om korleis «born berre gjekk rundt på måfå» – i ein pizzarestaurant, altså – og hevda han at det hang «demonisk kunst» på veggane.
To veker seinare køyrde Edgar Maddison Welch frå Nord-Carolina til Washington D.C, utstyrt med ei halvautomatisk rifle.
Welch var – blant anna etter å ha sett på Infowars – overbevist om at det vart halde born som sexslavar i kjellaren til Comet Ping Pong. Han ville frigjera dei. Etter å ha oppdaga at staden ikkje ein gong har ein kjellar, overga han seg til politiet.
Posobiec reagerte ifølgje ein lengre artikkel i Philadephia fyrst gjennom å twitra eit falsk sitat frå politisjefen i byen, der det vart nekta for ein samanhang med #Pizzagate. Sidan twitra han at Welch var ein skoldespelar og at det heile var ein falsk flagg-operasjon meint å diskreditera uavhengige journalistar som han sjølv. Seinare har Posobiec hevda at at han alltid meinte at #Pizzagata var latterleg, og at han filma besøket sitt for å debunke heile greia.
«Eg høyrde om det online, og tenkte at det var dumt. Eg drog dit for å vise at det berre var ein restaurant», seier han i Philadelphia, «og de er idiotar. Eg hadde ingenting med desse påstandane å gjera, og det var dumme påstandar».
Posobiec fekk også merksemd for ein del andre saker. Han var til dømes i høgste grad involvert i spreiinga av lekka e-postar frå Emmanuel Macron sin valkampanje i Frankrike.
Han vert også hevda å ha spela ei sentral rolle i ein svertekampanje mot Trump-kritikarar. Dette skjedde mellom anna ved hjelp av ein plakat med oppmoding om å valdta Melania Trump, ein plakat også ein annan ytre høgre-aktivist, Tim Gionet, skulda Posobiec for å ha laga sjølv.
I sum var han likevel ein marginal figur.
Sidan har han gjort karriere. Jack Posobiec har arbeidd for TV-kanalen One America News Network og for organisasjonen Turning Point USA.
Då Semafor -skribentane Shelby Talcott og David Weigel i mars i år spurte ei rekkje strategar i det republikanske partiet kven som var den viktigaste influensaren blant republikanske veljarar, var det Posobiec sitt namn som oftast dukka opp. Og medan Posobiec for lengst har lagt Pizzagate på hylla, og også har skildra nett den løgnhistoria som ein svindel, har han ikkje nølt med å omfamna andre løgnhistorie, som den om det «stolne valet» i 2020.
I september 2024 vart Posobiec invitert av Republican National Committee (RNC) – eit organ i det republikanske partiet som koordinerer valkampanjar og finansieringa av desse – til å snakka til frivillige valgobservatørar i Michigan. Han fortalte dei at var «den siste forsvarslina mot framrykkande marxisme»:
Me ser allereie korleis marxismen byrjar å snika seg inn. Det har allereie byrja. Spørsmålet er om me skal lata dei fullføra jobben eller ikkje?
Det leier tankane til den nyaste av ei rekkje bøker Posobiec har skrive dei siste åra. Tidlegare i år gav han nemleg ut boka Unhumans: The Secret History of Communist Revolutions (and How to Crush Them), saman med Joshua Lisec. Forordet i boka er skrive av Steve Bannon, som i nokre månader i 2017 var Donald Trump sin sjefsstrateg.
Det er ei … interessant bok.
På den eine sida utmåler ho marxistar – som Posobiec og Lisec eigentleg finn overalt – som «umenneske (…) slukt av nihilisme», som er «motstandarar av alt som utgjer menneskeheit» og dermed sjølv plasserer seg utanfor denne, i ei «undergruppe driven av elende». På den andre sida har forfattarane førebilete.
Den spanske nasjonalistiske diktatoren Francisco Franco vert skildra som ein stor mann i historia, som handla etter mottoet «Make Spain Great Again!». Den chilenske kuppmakaren og diktatoren Augusto Pinochet, som leia eit brutalt undertrykkande regime, vert også framstilt som ein helt:
Alle som var allierte med anti-sivilisasjonen vart nådelaust fjerna frå det chilenske samfunnet. Historiene om å kasta kommunistar ut frå helikopet kjem frå Pinochets utsletting av kommunismen frå midt på til seint på 1970-talet. Der Pinochet var, var det ingen kommunisme.
I fall det skulle vera nokon tvil understrekar dei to forfattarene også at deira historiestudiar har overtydd dei om at demokratiet aldri har makta å beskytta uskuldige frå «umenneska»: «Me må slutta å følgja reglane dei ikkje følgjer».
Det er jo oppsiktsvekkande nok at RNC inviterer ein av forfattarane bak denne boka til å snakka til valobservatørar. Men det stoggar ikkje der. Boka til Posobiec og Lisec har vorte reklamert for av USAs komande visepresident. J.D. Vance. I ein «blurb» for boka, skriv han:
Tidlegare marsjerte kommunistar i gatene og vifta med raude flagg. I dag marsjerer dei gjennom HR-avdelingar, universitetsområde og rettssalar for å føra juridisk krig mot gode, ærlege menneske. Jack Posobiec og Joshua Lisec avslører planane deira og viser oss korleis me kan kjempa attende.
Det fortel ein heil del om ei amerikansk høgreside i forfall.
Kva er dette?
Oppdateringar er eit nyhetsbrev frå Øyvind Strømmen, med fokus på ekstremisme, konspirasjonsteoriar og andre utfordringar mot det liberale demokratiet. Nyhetsbrevet vert laga på på fritida, og vil difor koma ut sporadisk.
Det er gratis å abonnera, og alle abonnentar får tilgang på dei same nyhetsbreva. Dersom du har høve til og ynskjer å bidra med nokre kroner kan du velja eit betalt abonnement.
Har du tips eller forslag til ting det burde skrivast om, eller til artiklar, bøker, podcastar eller anna som fortener merksemd? I så fall, ta gjerne kontakt. Det kan du gjera via e-post oyvindstrommen@gmail.com.
Eksterne lesetips
AP ser nærare på ei Pentagon-finansiert studie om ekstremistar i det amerikanske forsvaret, og peiker på problem ved både studia og debatten om henne.
Expo viser korleis den Sverigedemokraterna-tilkopla mediakanalen Riks gjorde ein antisemittisk aktivist til helt, og korleis ei feilaktig framstilling av ei hending i Stockholm spreidde seg, også til Israel.
Colin P. Clarke skriv på ICCT.nl om kontraterrorimplikasjonar av Trump sin valsiger, og om korleis terrortrugsmålet ser ut framover.
Tysk, polsk og austerriksk politi har slått til mot endå ei høgreekstrem gruppe, dei såkalla Sächsische Separatisten, blant anna på bakgrunn av opplysningar frå FBI.